Tajammul Kaleem Shayari - Punjabi Shayari
پاگل ہو کے سمجھاں آئیاں
ٹھیک سیانے ردّی بیٹھاں
اکے پکے پیراں اُتے
خورے کیہ کیہ لدّی بیٹھاں
تجمل کلیم
اکھ راتاں نوں کُھلی رہندی
اُس بازار دی باری وانگر
اک ہیرے نوں کہندا رہناں
کٹ کلیجا آری وانگر
تجمل کلیم
اس لئ اڈیا رنگ سی خورے
اپنے نال ای جنگ سی خورے
زندگی مول نہ مگروں لکھی
اونتر جانی منگ سی خورے
تجمل کلیم
ہمت وی منہ بھرنے ڈگی
لیکھ اڑائی ٹنگ سی خورے
سوچاں وچ فتور سی چوکھا
یاں فر زندگی تنگ سی خورے
تجمل کلیم
عشق عقل نوں سُٹ کے کنڈ پچھے
مال آپ رکھاندا اے ٹھگ اگے
سُجے پیر مجبوری دے چھالیاں توں
اُتوں عشق نے آکھیا، لگ اگے
تجمل کلیم
بُرے بندے دا بنے گا کیہہ خورے
سپ خوف دا پچھے، تے اگ اگے
تجمل کلیم
لیکاں کُٹی جاندے او
دھرتی پُٹی جاندے او
گھنٹہ گھنٹہ دسدے نئیں
لمی چُھٹی جاندے او
تجمل کلیم
دُکھ پتھر نہ پنڈا کچ
ایویں ٹُٹی جاندے او
ماواں کد تک جین گیاں
رُکھ تے پُٹی جاندے او
تجمل کلیم
0 Comments